LEGAZPI CITY — Nagpatanid an tagapagtaram kan Police Regional Office (PRO) 5 sa mga kapulisan sa Bicol region na pag-isipan nin marhay kan mga pulis an saindang gigibuhon urog na an mga nagpaplano na magibo nin kalokohan.
Ini makalihis na otobon ni Presidente Rodrigo Duterte an saiyang promesa sa mga suldados asin kapulisan durante kan kampanya na lalangkawan an sweldo kan mga ini.
Segun ki PRO5 spokesperson Pol. S/Insp. Malu Calubaquib sa intrevista kan Bombo Radyo Legazpi, 100% na high morale ngonian an mga kapulisan sa rehiyon urog na ngonian na enot na sweldo sa taong 2018.
Ipigduon kan opisyal na an pagigin seryoso sa pagseserbi sa publiko an bako sana huli sa dugang na sweldo na saindang mareresibe kundi huli ta an pagseserbi sa banwaan an saindang sinumpaan kan maglaog sa organisasyon.
Dugang pa ni Calubaquib na aram kan mga opisyal sa saindang organisasyon kun siisay an mga pulis na nagigibo kan saindang trabaho asin an mga naghahalat sana kan sweldo.
Ipinagirumdom man kan opisyal sa mga pasaway na pulis na imbwelto sa iligal na mga aktibidad an pagkakahali sa saindang serbisyo asin pagkawara kan mga mareresibeng benipisyo.
Mientras tanto, naglalaom man ini na sa masunod pang mga taon, igwang pang dugang na mga benipisyo na mas makakapag-boost pa sa morale kan mga kapulisan urog na an mga para sa PO2 hasta sa top rangking officials.
