LEGAZPI CITY— Nagdurar nin sampulong minuto an nangyaring engkwentro sa pagultanan kan mga tauhan kan Uson Municipal Police asin mga miyembro kan New People’s Army (NPA) sa Barangay Balding, banwaan kan Uson sa Masbate.
Sa intribista kan Bombo Radyo Legazpi ki PS/SUPT Froilan Elopre, Provincial Director kan Masbate PNP, kinumpirmar kaini an nasambitan na bakbakan na nag-ugat sa suboot insidente nin pambabadil na rerespondehan kuta kan mga pulis.
Sinabi ni Elopre na ginamit man sanang taktika kan NPA an pagpapaabot nin impormasyon dapit sa shooting incident ngani na tambangan an tropa kan gobyerno.
Siyam na pulis an nakalaban kan rebeldeng grupo na swerteng dae man napuruhan maski nasa high ground an kalaban.
Alagad lugadan sa engkwentro si PO1 Amistag na nagpaparahay na ngunyan sa ospital.
Dugang pa ni Elopre, dae na nagdara nin mobil an mga nagrespondeng pulis huli ta nagsususpetsar na ining baad mag-atake an NPA.
Pig-aaram pa sa ngunyan kun igwa nin casualty sa kampo kan bandidong grupo.
Mientrastanto, sinabi kan opisyal na nagkaigwa man nin haros kasabay na engkwentro sa Cawayan, Masbate kun sain pigsasabing duwa an nagadan sa lado kan NPA.
