LEGAZPI CITY – Pigdoon kan Sorsogon provincial tourism na dapat magtarabangan an gabos na provincia kan kabikolan nganing mapagayon asin mapauswag pa an sektor kan turismo sa rehiyon.
Segun ki Sorsogon Provincial Tourism Officer Bobby Gigantone sa intrevista kan Bombo Radyo Legazpi na dapat kabale an gabos na lugar sa kabikulan sa tourism packages nganing warang mabayaan asin dae pwedesir na sarong lugar sana an mamayagpag sa lado kan turismo.
Nagpapasalamat man ini sa pagkakatukdok kan Bicol International Airport huli ta may masasakayan an mga turista pasiring sa mga kataraid nindang provincia nganing magpasyar sa mga saindang mga pamosong atraksyon.
Sa ibong kan magkakaiba an atake nganing mapauswag an turismo sa mga kanya kanyang provincia, dae dapat suboot mawara an pagigin magturugang bilang sarong bicolano.
Pigdugang pa kan opisyal na nasa sainda na suboot kun papano ninda ipapabakal an saindang produkto huli ta kada provincia an magkakaiba an saindang mga tourist attraction.
Natural na suboot an kompetisyon pag-abot sa turismo, pero dapat magtenir na friendly compettion lang huli ta parareho lang nag ca-capitalized sa kagayunan kan kapalibutan.
Mientrastanto, nairehistro ninda Gigantone sa laog kan duwang bulan nindang monitoring na maabot sa 4,265 an mga domestic travelers an nagbisita asin nag-atendir ki regional conference na ipigsagibo sa provincia kan Sorsogon.
