LEGAZPI CITY- Nagpagirumdom an grupong Ban Toxics sa mga magurang na magin malikay sa pagbakal nin school supplies ngunyan na nagdadangadang na an pagbubukas kan School Year 2024-2025.
Segun ki Ban Toxics Campaigner Thony Dizon sa intrevista kan Bombo Radyo Legazpi na dapat na mas magin mabusisi an mga magurang sa pagbakal kan school supplies.
Bako sana suboot an presyo an kinakaipuhan na gamiton bilang basehan sa pagbakal kan mga gamit kan mga kaakian sa pag-aadal.
Tinawan duon kan opisyal na kun igwang mga nakakaraot na kemikal an mga babakalon na school supplies, pwedesir ining magkawsa nin peligro sa salud kan mga kaakian.
Segun ki Dizon na nahiling an dakulang consentration kan lead sa mga school bags asin mga water container o tumbler.
Aminado man an grupo na limitado sana an saindang kakayanan na magsuri kan mga pigagamit na pang kolor sa mga kagamitan kaya dapat na kilatisin kan mga magurang an saindang pagpili kan mga produkto.
Partikular na tinutukan kan Ban Toxics an mga palatandaan o product label na makakatabag ngani na maaraman kun salbado sa salud an manlain lain na klase nin school supplies.
