LEGAZPI CITY-Nagkapirang Overseas Filipino Workers sa Israel apektado huli sa nagpapadagos na iriwal sa nacion, mantang uminabot na sa 6 an irido asin saro an kritikal base sa report kan Overseas Workers Welfare Administration (OWWA).
Segun kay Bombo International News Correspondent sa Israel na si Shay Kabayan, sa intrevista kan Bombo Radyo Legazpi, nagsirena an Israel mapadapit sa pagatake kan Iran sa nacion, alagad nagpuon suboot ini sa oras nin alas 2:00 asin 3:00 nin pagkaaga.
Nadamay man an saro na building sa lugar kung sain igwang makusog na impact an mga missile, na nagresulta sa pagkahulog kan mga bintana asin salming.
Dagdag pa ni kabayan na iba an mga atake kan Iran kumpara kan dati, alagad 99 na posiento an nasasalo kan nasambitang mga airstrike. Apektado man an mga OFWs sa saindang pagtatrabaho mantang sararado an mga opisina, airport asin eskwelahan sa bilog na nacion kan Israel.
Dugang pa ni Kabayan na 5 aldaw na sindang dae nakakapadara sa saindang mga kapamilya sa pilipinas huli sa apektado man an saindang trabaho mapadapit sa nangyayaring sigalot sa lugar.
Sa presenteng panahon, dakol na nawasak na mga building sa lugar huli sa nagdadakulang tensyon kan gera, alagad an mga Pinoy na nakatenir sa nasambitang lugar, naghahalat kung nuarin magigin normal an sitwasyon.
Nagtao naman suboot nin kooperasyon an embahada asin mga ahensiya kan Pilipinas para sa repatriation kan mga Pinoy na apektado nasambitang lugar.
Nagpapagirumdom man an Israeli government sa mga indibidwal na i-mantenir an pagigin kalmado asin pag igwang nadangog na mga sirena, magebakwar na sa mga safe na lugar.
