LEGAZPI CITY-Pigkokonsiderar na an pag-ebakwar kan mga Pilipino hale sa Israel pasiring sa Jordan sa paagi kan Allenby Bridge, enkaso magin grabe pa an iriwal sa tahaw kan Israel asin Iran.
Pig-aadalan kan gobierno kan Pilipinas an posibilidad na ii-ebakwar an mga Pilipino hale sa Israel pasiring sa Jordan sa paagi kan Allenby Bridge.
Segun kay Department of Foreign Affairs Undersecretary Eduardo de Vega, isasagibo ini kung magkusog an magigin atake sa tahaw kan duwang nacion.
Segun man kay Assistant Secretary Robert Ferrer, an nasabing tulay sa Jordan bukas sa limitadong oras sana kada Domingo poon alas 8:00 nin aga hasta alas 2:00 nin hapon, alagad mangyayari ini kung an lebel nin alerto sa Israel itaas sa lebel 3 o 4.
Mantang sa irarom kan Alert level 3, isasagibo an boluntaryong repatriation mantang an Alert level 4 nangangahulugan nin mandatory repatriation.
Dati nang sinabi nasambitang ahensiya na pig-aadalan ninda kung i-implementar an voluntary o mandatory repatriation kan mga Pilipino sa Israel.
Segun sa mga opisyales, na sa presente nasa 30,000 na an Pilipino na nagtetenir sa lugar.
Mientrastanto, piglalaoman man kan nasambitang ahensiya an sarong contingency plan para sa mga Pilipino sa Iran, kaiba na an posibleng pag-ebakwar kan mga ini sa paagi man kan Turkmenistan.
Sa ibang lugar kan Jordan, na nasa tahaw kan magkalaban na Israel asin Iran, pig-aabisohan man na magbantay asin magin alerto an mga Pilipino na nakatenir duman.
