LEGAZPI CITY – Nagtetenir na salbado an Filipino Community sa Burbank, California sa nangyayaring mahiwasang wildfire.
Magigirumduman na nagdeklara na nin state of calamity an pinakamatawong estado kan US makalihis na duminoble an dakula kan wildfire na marikas na naglalakop.
Segun ki Bombo International Correspondent Kevin Nuñez na ngunyan lang na-eksperyensya an mahiwasang kasulo sa Southern California.
Kalimitan suboot na sa kabuludan lang nangyayari ini asin ikinakigkig nindang buminaba an kasulo sa mga kaharongan.
Makusog man an duros kan paros sa kabuludan kun kaya nagdakula asin nagruso pababa sa mga kaharongan an kalayo.
Pagladawan ni Nuñez na totally wash-out an mga rinabasan kan kasulo asin gare suboot nasa laog na kan impyerno an namamatean sa lugar nin huli ta warang pigpapatawad an wildfire maski mga kaharongan asin behikulo na gibo sa metal.
Nin huli sa wildfire an kinanselar na an mga klase sa naunambitang estado.
Napansin man kaini na poon kan magsiklab an kasulo, gabos na mga bombero sa California an nagtatarabangan na nganing matumpos an kalayo asin dae na makapaminsala pa.
Mensahe kaini sa mga kaanak kan mga kapwa Pilipinong nagtetenir man sa nasabing lugar na amay nang i-contact an saindang kapamilya nganing maaraman kun nasa maray sindang kamugtakan.
