Naglangkaw pa an numero kan mga pamilyang Pilipino na nakaeksperyensya nin kagutuman sa nacion kan Marso 2025.
Basado sa resulta kan non-commissioned survey kan Stratbase-Social Weather Stations (SWS), an numero kan mga tios na pamilyang Pilipino na nakaeksperyensya nin total hunger an suminakat sa 35.6% kan Marso, gikan sa dating 26.4% kan Pebrero.
Basado sa datos, an total hunger o kumbinasyon kan moderate asin severe hunger, an nagpuon na maglangkaw kan Enero 2025 (22.3%) sa mga harong na pigkonsidera an saindang sadiri na tios.
Bahagya man ining naglangkaw sa non-poor families nin gikan sa 16.2% kan Pebrero hanggang 18.3% kan Marso.
Basado man sa survey, an porsyento kan mga pamilyang Pilipino na nagsasabing sinda tios an naglangkaw nin sarong puntos, o nagin 52% kan Marso, gikan sa dating 51% sana kan Pebrero.
Nabatid na an estimated numbers kan self-rated poor families an nasa 14.4 milyon na kan Marso, gikan sa dating 14.3 milyon kan Pebrero.
Susog sa Stratbase-Social Weather Stations, an sarong puntos na paglangkaw kan nationwide self-rated poverty an kumbinasyon kan bahagyang paglangkaw kaini sa Visayas asin Balance Luzon, asin bahagyag pagbaba man sa Mindanao asin Metro Manila.
Nabatid na an porciento man kan borderline poor families an nasa 12% kan Marso, o bahagyang nagbaba gikan sa 13% kan Pebrero asin 14% naman kan Enero.
Mantang an mga residencia na nagsasabi na bako sinda tios an nagtetenir sa ‘record-high’ na 36% sa tulong magkakasunod na bulan puon kan Enero.
An nasabing survey an isinagibo kan Marso 15-20, 2025 sa paagi kan ng face-to-face interviews asin pinartisiparan nin may 1,800 rehistradong botante sa nacion na may edad 18-anyos pataas.
