Inimbitaran kan National Bureau of Investigation an mga nadawit asin pinangaranan na indibidwal kan dating security aide ni former House Speaker Lord Alan Velasco na si Rodulfo Gracioso Jr. sa isinumite kaining sinumpaang salaysay.
Segun ki NBI Dir. Atty. Melvin Matibag, an pagpapaapod kan ahensya an parte kan isasagibong imbestigasyon asin pagtatao nin tsansa na makapagtaram an mga imbweltong personalidad.
Sa nasabing ‘sworn affidavit’ kasi ni Gracioso, binanggit kaini an pangaran ninda Vice President Sara Duterte, Davao City Rep. Paolo Duterte, dating Presidente Rodrigo Duterte, former House Speaker Velasco, Marikina 2nd District Rep. Miro Quimbo asin iba pa.
Pigkokonektar ni Gracioso si Rep. Miro Quimbo sa pag-deliver nin kwarta sa dating House Speaker na naghali suboot kinda Curlee asin Sarah Discaya.
Si Miro Quimbo, agom ni dating Marikina 2nd Dist. Rep. Stella Quimbo na nagsirbing ‘acting chairperson’ kan House Committee on Appropriations kan buminaba sa pwesto si former Ako Bicol Party-list Rep. Zaldy Co .
Sa sinumpaang salaysay ni Gracioso, itinuro kaini si Rep. Miro Quimbo na sawro sa mga pinaghalian kan ‘cash delivery’ asin sinabing nagkapirang beses na nangyari an pagdadara nin kwarta hali sa mga contractor.
Inihayag kaini na mas nagin madalas suboot an pag deliver kan kwarta makalihis ining maging Speaker kan House of Representatives kan Oktubre 2020.
Dugang pa ni Gracioso, pigsugo suboot siya kaito kan saiyang Boss Allan ngani na mag-pick up nin kwarta hali ki Rep. Quimbo asin darahon sa sarong lugar ngani na bilangon.
Sa ibong kaini, sinabi ni NBI Director Matibag na kinakaipuhan na maberipika an mga ipigbuyagyag ni Gracioso antes dagos na pagtubudan.
