Legazpi City- Salbadong nakadaong an mga pasahero asin mga tripulante kan sarong vessel na pasiring sa Tabaco Port makalihis na maraotan sa tahaw kan kadagatan sakop kan San Miguel Bay o Lagonoy Gulf.
Sa intrevista kan Bombo Radyo Legazpi kay CG LTJG Kenny Villafuerte, Commander, CG Station Catanduanes, uminabot nin haros labi 14 oras na nagpalutang lutang sa kadagatan barko huli sa nag-over heat an makina kan barko. Gikan an barko sa Virac Port asin naghale sa pantalan bandang alas 6 nin banggi antes na narautan na ini sa naunambitang lugar.
Segun sa opisyal dae tulos nakapagresponde an Coast Guard Catanduanes huli na man sa dae nagreport an kapitan kan barko asin sulamenteng naaraman an sitwasyon sa paagi kan sarong pasahero na sakay kan barko. Makalihis man na maresibe an report hale sa pasahero tulos man na kinumpermar kan ahensya an impormasyon sa kapitan asin naaraman na nakapag-apod na ini ning magto-tow sa barko pasiring sa Tabaco Port.
Base sa impormasyon igwang sakay na maabot sa 104 na mga pasahero sa barko asin igwa man na 38 na tripulante asin 12 na rolling cargos.
Mantang nasa dagat an manhamiento kan barko nagtao man nin mga pagkaon sa mga pasahero. Asin dakulang pasalamat man na salbado ining nakaabot sa pantalan kan Tabaco.
