LEGAZPI CITY- Nagpatalbugan sa pre-pageant competition an 13 partisipantes kan Mr. Grand International 2018 sa provincia kan Albay.
Sa intrevista kan Bombo Radyo Legazpi ki event coordinatior Atty. Perr Bober, ipigkondusir an nagkapirang photo shoot sa Vera Falls sa banwaan kan Malinao, asin sa Quituinan Hills asin Sumlang Lake sa banwaan kan Camalig.
Napag-araman na kainanan sa mga partisipantes an mga representante kan Morocco, The Netherlands, Thailand, Cambodia, Canada, Pilipinas asin iba pang mga nacion na enot nangnagkaigwa nin aktibidad sa ciudad kan Laoag.
Segun ki Bober, mawot ninda na mai-orgulyo sa bilog na kinaban an gayon kan Albay asin maipahiling na kaya kan provincia na mag-host nin international competition.
Mientras tanto, pig-aantabayanan na kan mga Albayano an coronation night kan ika-duwang edisyon kan kompetisyon sa Setyembre 27 na gigibuhon sa sarong mall sa banwaan kan Polangui, Albay.
Napag-araman na dae na man nag-imbitar nin mga darakulang personalidad hali sa Manila ngani na ma-showcase an talento kan mga Bicolano.
