LEGAZPI CITY—Pighayag kan mga paratukdo an saindang padagos na paghihingoa nganing maresolbaran an saindang mga pigkakahampang na kadificilan sa sektor kan edukasyon katakod kan selebrasyon kan World Teachers’ Day.
Segun ki Department of Education Legazpi City Assistant Schools Division Superintendent Lauro B. Millano, sa intrevista kan Bombo Radyo Legazpi, pighohongoa kan saindang sektor an pagdugang nin teaching personnel nganing mag-gian an trabaho kan mga paratukdo, probisyon kan matitibay na classrooms, nasa 1:1 ratio na an mga kagamitan, laboratoryo, libro asin iba pang kinakaipuhan kan mga paratukdo asin estudyante, maayos na internet connectivity, asin pagdugang sa sweldo kan mga personahes kan sektor nin edukasyon.
Dugang pa digdi an padagos na pagpauswag na maibarewas an maray na serbisyo para sa komunidad.
Segun pa ki Millano na an saro sa mga magayon na ekspersyensya bilang sarong paratukdo an nakukua nindang affirmations sa mga magurang asin estudyante huli kan saindang mga esfuersos.
Tinawan-duon niya man na importante an pagselebrar kan teachers’ day huli sa saro sinda sa mga importanteng propesyon asin dae maininigar an saindang epekto sa pamumuhay, sitwasyon, asin iba pang sektor.
Mientrastanto, nagpasalamat man an opisyal sa mga kapwa paratukdo na nakisumaro sa pagselebrar kan World Teachers’ Day sa ciudad kan Legazpi.
