LEGAZPI CITY – Ikina-ugma kan mga paratienda nin sira sa Legazpi City Public Market an lakdang kan Lokal na gobierno na pagpapasa-iraraom sa rehabilitasyon kan merkado.
Segun ki Fish Section Association-Legazpi Public Market Vice President Ramon Trilles sa intrevista kan Bombo Radyo Legazpi labi an saindang kaugmahan huli ta na-otob an saindang kahagadan na masalidahan an flooring asin malinigan an atop.
Mawot man nindang mapakarhay an papag na piglalaganan kan mga panindang sira asin an drainage system nganing malikayan an pagkabara mantang nagpapadagos na an pagpintura sa lugar.
Alagad aminado man siya na huli sa rehabilitasyon an nagkakawsa man ini nin kaulangan sa mga vendor urog na sa mga maghapon nagti-tienda.
Pig-abisuhan niya na man an saiyang pag-iriba na mag-adjust na muna an mga ini mantang nagpapadagos an pagpapakarhay kan merkado.
Nangapodan man si Trilles na sabuton na sana muna an mga nagta-trabaho nganing dagos na ining matapos asin mapakinabangan na kan mga arug nindang paratienda sa Legazpi City Public Market.
