LEGAZPI CITY – Warang nagiginibo sa halangkaw na presyo kan mga panindang gulayon an nagkapirang paratienda sa merkado publiko kan Malilipot sa provincia kan Albay.
Segun sa paratienda na si Rosita Vilgar sa intrevista kan Bombo Radyo Legazpi na nagmahal na an presyo kan mga barakalon makalihis na rapaduhon an rehiyon kan mga raot kan panahon kan nakaaging taon.
Haralangkaw man giraray an presyo kan mga barakalon, partikular an mga prutas arog kan manga, pati na an mga pansahog arog kan bell pepper asin labuyo, na nag-abot nin sanribo an presyo kada kilo.
Pigtaram pa ni Vilgar na wara man sindang magiginibo sa mga agrangay kan mga nagkapirang konsyumer nin huli ta sinda man an malulugi kun bababaan ninda an mga pigatinda nindang gulayun.
Piglalaoman ninda na magbago an presyo ngunyan na kakatapos pa sana kan pag selebrar kan bagong taon.
Pangapodan kaini sa mga nagbabakal na sabuton na sana an mga presyo nin huli ta sadit man sana an saindang kita sa pagtitinda nin gulayon sa ngunyan.
