LEGAZPI CITY – Bitbit kan Bicolana Gabriela an saindang pangapodan asin agrangay sa gobierno ngonian na pigkomemorar an International Women’s Day.
Segun ki Gabriela Bicol Spokesperson Jen Nagrampa sa intrevista kan Bombo Radyo Legazpi na mawot nindang ma-irehistro an karapatan kan mga kababaihan urog na sa presenteng panahon.
Makasaysayang aldaw suboot an Marso 8 para sa mga kababaihan huli ta ipinaglaban kan mga kababaihan kan nakaaging panahon an 8 oras na pagtatrabaho hale sa dose oras.
Bitbit ninda an pangapodan sa gobierno na pababaon an presyo kan mga pangenot na barakalon huli ta napakahalangkaw an antas kan inflation partikulamente na sa rehiyon siring man an pagtanggal kan tax asin e-vat sa mga barakalon huli ta dapat na may gibuhon sinda mapadapit digdi.
Mawot man ninda na suportaran asin tawan nin kompensasyon an mga paraooma huli ta kadaklan sa mga ini an dae pa nakabuwat makalihis rapaduhon kan mga nakaaging raot kan panahon an kabikolan.
Pigtaram pa kaini na dapat madangog kan gobierno an agrangay kan mga ordinaryong obrero na kulang an P395 pesos na minimum wage huli ta sa presyo pa sana suboot kan orig na labi P400 kada kilo an kulang na para sa sainda.
Kadaklan man suboot sa mga nagtatrabaho an dae man nag-aabot sa minimum wage an saindang nakukuwang sahod kun kaya grabeng pagtitipid an piggigibo kan mga pilipinong Ina sa saindang budget nganing makaraos sana kan saindang gastuson sa maghapon.
Padagos an pangapodan ninda Nagrampa sa gobierno na itaas an sahod, ibaba an presyo kan barakalon, wakasan an kontrakwalisasyon, ipaotob an nakabubuhay na sahod, asin wakasan an kadahasan laban sa kababaihan.
