LEGAZPI CITY- Nakapagrehistro nin mga pagbaha sa nagkapirang mga barangay sa ciudad kan Legazpi kasuudma kasunod kan naeksperyensyahan na mga pag-uran.
Segun ki Legazpi City Disaster Risk Reduction and Management Office head Engr. Miladee Azur sa intrevista kan Bombo Radyo Legazpi na an nagkapira sa mga flooding incidents an marikas man na nag-subside makalihis na maghupa an mga pag-uran.
Katakod kaini, sinabi kan opisyal na dapat na antes pa man umabot an panahon kan tag-uran igwa ng pigigibong mga lakdang an mga barangay ngani na maibitaran an kaparehong insidente.
Kaibanan sa mga ini an paglilinig kan saindang mga kanal asin paghahali kan mga basura na nakakabara sa bulusan kan tubig.
Paliwanag ni Azur na highly urbanized na an ciudad kan Legazpi kaya dapat na pigdodoble man an mga lakdang siring kan pagtatanom urog na ngunyan na padagos na naglalala an epekto kan climate change.
