LEGAZPI CITY – Nakaantabay an Libon Municipal Disaster Risk Reduction and Management Office (MDRRMO) sa Albay makalihis na makapagrehistro nin mga pagbaha asin pagrasay nin daga.
Paros na habagat an nakakapagpa-uran sa dakol na lugar sa Bicol, sigon sa Philippine Atmospheric, Geophysical and Astronomical Services Administration (PAGASA).
Sa intrevista kan Bombo Radyo Legazpi ki Libon MDRRMO head Ian Secillano, passable naman ngunyan an Sagrada Road, Bonbon-Bulusan Boundary asin Paclas Road para sa mga 4-wheeled vehicles makalihis na makapagrehistro nin pagbaha.
Hirarom pa an tubig sa San Isidro (Zone 1) mientras na cleared na an agihan sa San Vicente makalihis na magkaigwa nin pagrasay nin daga.
Nagtao man nin rekomendadong ruta si Secillano kan mga pasiring sa Centro Poblacion o Polangui kun sain hali sa Bonbon, maagi sa Burabod, San Vicente, Bacolod, asin San Isidro (Ibong) pasiring sa Marayag.
Sigon ki Secillano, 28% kan populasyon an nasa huma kan pagbaha huli ta an Libon an nagsisirbing “catch basin” kan mga tubig sa Albay.
Preparado man an mga evacuation center kun encaso kaipuhanon na mag-evacuar kan mga apektadong pamilya.
