LEGAZPI CITY- Pinawi kan Philippine Institute of Volcanology and Seismology an pagkahadit kan publiko sa posibleng pagdausdos kan lahar deposits hali sa bulkang Mayon.
Segun ki Phivolcs resident volcanologist Dr. Paul Alanis sa intrevista kan Bombo Radyo Legazpi na wara man na nairehistrong lahar events sa ibong kan mga naeksperyensyahan na pag-uran.
Sa ibong kaini, nakapagrehistro nin rockfall events na pighihiling na posibleng resulta kan makukusog na mga pag-uran sa provincia.
Sinabi man kan opisyal na padagos pang namo-monitor kan saindang mga instrumento an inflation o paghuhubag sa Mayon volcano.
Huli digdi, dae pa dagos na naibababa an alerto kan bulkang Mayon na presenteng nasa alert level 1.
