LEGAZPI CITY- Tinawan duon kan mga otoridad na dae tatawan dalan an anuman na klase nin iligalidad sa mga pantalan.
Ini an kasunod kan ginibong entrapment operation kan mga otoridad kontra sa tulong mga suspek na suboot nagsisingil nin P20 na iligal na bayad sa mga biyahero sa Matnog port.
Segun ki Port Management Office Bicol Media Relations Officer Achilles Galindes sa intrevista kan Bombo Radyo Legazpi na maikokunsiderar na illegal fee an nasabing P20 na suway pa sa mga legal na pigsisingil sa pantalan.
Nilinaw man kan opisyal na nadakop an mga suspek sa blue lanes asin nagtatangro nin mas marikas na proseso sa mga biyehero.
Aminado an opisyal na maski pa sadit na kantidad sana ini, dae maipagkakaila na dakulang pasanin na sa mga biyahero urog pang bako madali na maghanap nin kwarta.
Segun ki Galindes na kinakaipuhan man na tandaan kan publiko na warang ibang babayadan sa mga pantalan kundi an terminal fee ticket asin pwedesir na ipaabot sa mga otoridad an anuman na iregularidad.
