LEGAZPI CITY—Padagos an imbestigasyon kan mga otoridad sa nangyaring panggagadan sa 18-anyos na babae sa ciudad kan Tabaco.
Segun ki Tabaco City Police Station Public Information Officer Police Staff Sergeant Elaine Adriano, sa intrevista kan Bombo Radyo Legazpi, pasado alas-10:05 nin pagkabanggi kan Dominggo, Hunyo 22, sarong 20-anyos na lalaking residente kan Barangay Sto. Cristo, Tabaco City an nagpasiring sa istasyon kan pulis kaiba an saiyang magurang nganing i-report an suboot paggadan asin paglubong sa daga kan hawak kan saiyang nobya.
Makalihis na maresibi an impormasyon, tulos na nagpasiring an mga otoridad sa lugar na pigsalaysay kan suspek nganing maberipika kun lehitimo an nasambitang insidente.
Digdi na napag-araman na inilubong sa daga an 18-anyos na babaeng biktima sa Barangay Pawa kan naunambitang ciudad.
Basado sa inisyal na imbestigasyon kan saindang opisina, na kan nakaaging Biyernes, Hunyo 20, alas-7 nin banggi, nagpasiring an suspek asin biktima sa residencia kan tiyoon kan suspek sa Purok 5, Barangay Pawa, Tabaco City.
May sarong bahay-kubo sa nasabing lugar kun saen digdi na suboot nagpuon an dae pagkasinabutan kan suspek asin biktima antes na nag-abot na sa pisikalan kun saen nagtookan an duwang persona, na nagresulta sa pagkagadan kan babaeng biktima.
Sinabi kan opisyal na isinairarom na sa otopsiya an hawak kan biktima ngani maaraman an kawsa kan saiyang pagkagadan.
Dugang pa ni Adriano, boluntaryong nagsurender an suspek sa mga kapulisan huli sa pagkumbinsi saiya kan saiyang mga magurang na magsurender na.
Wara man suboot sa impluwensya nin droga o arak an suspek kan nangyari an krimen, segun sa imbestigador kan saindang opisina.
Mientrastanto, kan Sabado, Hunyo 21, enot nang ipig-report sa Tabaco PNP kan magurang kan biktima na dae pa nakakauli an saindang aking babae kun saen huring na-contact ini kan Hunyo 20.
Sa ngunyan nasa kustodiya na kan Tabaco PNP an suspek asin posibleng mahampang sa kasong murder o homicide—depende sa magigin resulta sa otopsiya kan biktima.
Abiso man ni Adriano sa mga kajovenesan na magpokus muna sa saindang pagklase huli ta may tamang oras man an pakikipagrelasyon.
Pagiromdom man kan opisyal sa mga magurang na pagtaga-kumustahon an saindang mga aki nganing maaraman an saindang sitwasyon.
