LEGAZPI CITY- Aminado an sarong election watchdog na dakulang bagay kuta an pagkokundusir kan citizen’s arrest o warrantless arrest para sa mga personalidad na imbwelto sa vote buying asin vote selling.
Alagad nahahadit an grupo na maabuso an lakdang huli sa presenteng electoral system sa Pilipinas kun sain mayorya kan mga kandidato an mayayaman asin mga poderosong indibidwal.
Segun ki Kontra Daya Convenor Danilo Arao sa intrevista kan Bombo Radyo Legazpi na posibleng dae kayanon kan mga ordinaryong obrero an pagibo kan citizen’s arrest.
Paliwanag kan grupo na kinakaipuhan muna na magin assertive an Commission on Elections sa pagpapanimbag sa mga imbwelto sa vote buying.
Segun ki Arao na posibleng maduon an mga personalidad na pigsugo sana kan mga politiko na magbarewas nin kwarta para sa vote buying.
Magigin epektibo sana suboot ini kun makikipagtabangan an mga pigsugo na iduon an mga politiko na nasa likod ninda.
