LEGAZPI CITY—Padagos an pigsasagibong imbestigasyon kan mga opisyales kan Barangay San Isidro asin mga kapulisan sa banwaan kan Sto. Domingo, Albay mapadapit sa kinuang lawas kan 82-anyos na lola kakalubong pa sana sa saiyang nitso sa Sto. Domingo Public Cemetery.
Magigiromdoman na nadiskubre kan sarong sepultorero kan nasambit na sementeryo na nawawara na an lawas kan lola sa saiyang kabaong.
Segun ki San Isidro, Sto. Domingo Kapitan Danilo Ballester Jr., sa intrevista kan Bombo Radyo Legazpi, na tulos ninda ining ni-report sa mga kapulisan.
Dugang kan opisyal na sa saindang paghanap sa biktima, may nahiling sinda na traces na saindang sinundan kun saen an diaper asin buhok kan biktima an nakua sa ibang nitso.
Nakua ninda an lawas kan biktima na nakadapa sa rayong 100 metrong distansya sa saiyang kabaong.
Dugang digdi na may kapot na sinda kan CCTV footages sa lugar asin pigsumiter na sa mga kapulisan.
Sa presente padagos na nakikipagkoordinar an saindang barangay sa mga otoridad.
Nangapudan man an opisyal sa mga posibleng nakalihing na magtaong impormasyon sa saindang opisina o sa mga kapulisan para sa ikakaresolbar kan nasambit na insidente.
