LEGAZPI CITY – Pig-iimbestigaran na kan mga opisyales kan Barangay Padang, Legazpi City kun tagsadiri kan saindang mga residente an mga nagbabalagaw-bagaw na ayam sa saindang barangay.
Segun ki Wendy Alada, an sekretarya kan naunambitang barangay sa intrevista kan Bombo Radyo Legazpi na katakod suboot ini kan nagkaigwa nin aksidente sa saindang lugar kun saen na-irido an sarong motorista makalihis na makabangga nin ayam.
Nakikipagkoordinar na sinda sa saindang mga Barangay Health Workers nganing maaraman kun siisay an may ataman kan ayam na kapareho kan naimbwelto sa insidente.
Pigtaram pa kaini susog sa saindang inisyal na imbestigasyon, wara sa mga ka-barangay ninda an nagtuga asin nag-aako sainda an nabunggong hayop.
Piglinaw man kan opisyal na dae man ninda masabi na residente ninda an kagsadiri kan imbweltong ayam nin huli ta mahigot nindang pigpapaotob an saindang ordinansa mapadapit sa responsableng pag-ataman nin mga hayop.
Sa presente, mawot nindang aramon kun hale sa kataid nindang barangay an mga hayop na mga napapadpad na pwedesir na makadeskwido.
Sa oras suboot na maaraman ninda kun sa ibang barangay hale an imbweltong ayam, tulos sindang makikipag koordinar nganing maibitaran an aksidente na kawsa kan mga stray animals.
Pagirumdom ni Alada sa mga residente na magin responsableng pet owners mantang kahagadan sa mga motorista na nag-aagi sa saindang barangay na ibitaran an marikas na pagpapadalagan nganing malikayan an mga kaparehong insidente.
