LEGAZPI CITY- Aminado an sarong Overseas Filipino Worker sa Israel na dae nawawara an saindang pagkahadit huli sa pagbalos na pigigibo kan Iran.
Segun ki Bombo International News Correspondent Shay Kabayan sa intrevista kan Bombo Radyo Legazpi na pigigibo man gobierno kan Israel an gabos ngani na maprotehiran sinda.
Sa ibong kaini, dae suboot mawara an saindang takot urog pa na dae aram kun sain asin nuarin mabagsak an mga drones asin missiles.
Katunayan, sa kasagsagan kan intrevista kan Bombo Radyo Legazpi ki Kabayan, nagtanog an ‘warning siren’ sa lugar na nagpapatanid kan nagdadangadang na missile.
Huli digdi, napadalagan ini asin an mga kapwa Pilipino sa bomb shelter ngani na masierto an saindang seguridad.
Mientras tanto, hagad na sana ngunyan kan mga Pilipino sa Israel na matapos na an kariribukan asin makabalik an katoninongan.
