LEGAZPI CITY – Dae nahahandal an mga nagkapirang Overseas Filipino Worker (OFW) sa South Korea sa deklarasyon ni SoKor President Yoon Suk-Yeol Emergency Martial Law.
Segun kay Raymund Racuya an BINC sa South Korea sa intrevista kan Bombo Radyo Legazpi na dae man namatean an kariribukan sa mga syudad sa SoKor nin huli ta sa Seoul lang mismo namatean an tensyon asin dae man nahaloy an Emergency Declaration kan Batas Militar nin huli ta pigborotohan kan mga lehislador na punduhon an nasabing pagdeklara.
Normal siring kan dati an pamumuhay suboot sa nasabing nasyon nin huli ta posibleng tururog na an mga tawo kan oras na magdeklara an saindang Presidente maliban sa Seoul na nagin sentro kan pagultangan.
Pigtaram man kaining dae man nagpanic an saindang mga pagrugaring nin huli ta sa social media lang nagputok an nasabing kariribukan asin posible na mangyari an piglulutong impeachment kontra kay President Yoon nin huli ta unkonstitusyunal an saiyang ginibo.
Wara mang balak umuli sa Pilipinas si Racuya sa ibong kan mga nangyayaring kariribukan sa SoKor nin huli ta mas malala pa suboot an nangyari kan Covid 19 Pandemic asin sa huma kan posibilidad nin pagbaba kan palitan nin Korean Won sa Philippine Peso.
Sa presente, wara man na mga kapwa OFW kaini na mawot magpa-repatriate asin magpa-rescue nin huli ta matuninong na an saindang syudad sa mga nakalihis na magdamlag.
Pangapodan kaini sa gobyerno kan South Korea na gibuhon an mas ikakarahay kan mga namamanwaan basta syertuhon na napapaotob ini nin maray an pamamalakad asin warang madadamay na sibilyan o OFW sa nasambitang nasyon.
