LEGAZPI CITY – Nagdadakol suboot sa presente an numero kan mga pigtatamaan nin Heart disease sa nasyon segun sa sarong health expert.
Magigirumduman na naenot na mang nagpagirumdom an Department of Health (DOH) sa publiko mapadapit sa ‘Holiday Heart Syndrome’, na sarong kondisyon kun saen nagkakaigwa nin iregular na tibok kan puso na kawsa kan pag-inom nin arak asin pagkaon durante kan christmas season.
Segun kay Dr. Tony Leachon sa intrevista kan Bombo Radyo Legazpi na nagdakol an numero kan kaso manungod sa nasabing helang ngunyan na bulan makalihis an wala-toong karaonan durante kan selebrasyon kan pasko asin bagong taon.
Obserbasyon man kaini na nagdakol an mga tawo na biglang nagtaba nin huli ta dae na nag-eehirsisyo an iba.
Nangengenot sa mga helang na naiirehistro asin mas dakol sa Pilipinas iyo an may helang sa puso, stroke asin diabetes.
Pigtawan doon ni Leachon na nagdakol an numero nin huli ta nag-iba an estilo kan pamumuhay pakatapos kan pandemya makalihis na mauso an work from home setup.
Iyo man suboot ini an 80% na rason kan pagkagadan kan mga pilipino asin 756 million an nagin kabilugang gastos sa mga ini sa hospital kan nakaaging taon.
Pagirumdom man kaini sa publiko na mapagal ma confine sa presenteng panahon nin huli sa zero budget kan Philhealth asin sa padagos na paghalangkaw kan mga babarakalon na dara man kan inflation kun kaya mas maray na sana suboot na ingatan an sadiri.
