LEGAZPI CITY — Ipighayag kan sarong abogado na sarong pananakot an ginibong paghayag ni House Speaker Pantaleon Alvarez na hahalion an mga kongresista sa saindang pigpapamayuhang komite kun magkontra an mga ini sa pagpasar kan death penalty.
Segun ki Atty. Yami Balayo, may epekto an naging taramon kan kongresista na nagkondisyon sa isip kan mga tawo asin maging kan ibang mga kongresista ngane na magpabor sa propuestong ley.
An mga pamayo kaya kan kada komite an bulag man an bayad, sweldo asin pondo kun kaya natakot man suboot an ibang kongresista na mahali ini sa sainda.
Posible man suboot na maibalik pa sa pwesto an mga nahaling opisyales alagad kaipuhan na magboroto liwat.
Nangapudan man si Balayo sa mga namamanwa na maging maaram sa gabos na nangyayari sa nasyun partikular na sa pagpasarar kan death penalty huli sa bako suboot ini simpleng bagay sana kundi importante ini huli sa nakataya suboot digdi an puturo kan sarong nasyun.
Dugang kaini, dae pa suboot tapos an laban kun kaya inengganyar kan abogado an lambang saro na mag-intra sa mga diskusyon ngane na madangog kan mga Senador asin kongresista an mga boses.
Makakatabang suboot ini sa aldaw na madesisyon an mga ini ngane na dae maaprubaran an death penalty sa Senado.
