LEGAZPI CITY — Nakakumpiskar nin 23 na mga stray dogs an City Veterinary Office ngonian na aldaw sa paglilibot kan mga personahe kan ahensya sa apat na barangay sa ciudad kan Legazpi.
Ini an parte sana kan target kan ahensya na nasa poco mas o menos 8,000 na mga balaw-bagaw na ayam.
Segun ki City Veterinarian Dr. Emannuel Estipona sa intrevista kan Bombo Radyo Legazpi, hali an mga ini sa Barangay Pawa, Bogtong, Cruzada asin Bitano.
Pag-eksplikar kan opisyal, parte an lakdang kan padagos na pagiging agresibo kan oficina sa pagdakop kan mga stray dogs na komon na rason kan paglakop kan rabies.
Ipinagpapasalamat man ni Estipona na padiit-diit nang nakakaukod an dog owners asin pig-aako na dae na ninda kayang ma-kontrol an mga ataman kaya boluntaryo na ining ipigsusurendir.
Mientras tanto, dadarahon an dinakop na mga ayam sa dog pound sa Barangay Banquerohan asin kun dae ma-claim sa laog nin tulong aldaw kan kagsadiri, mahanap na nin bagong maataman sa mga ini.
Alagad an mga hayop na dae na kayang mabulong an mga helang, isasairarom na sa euthanasia tangarigt dae na makaulakit nin helang.
