LEGAZPI CITY- Ikinaogma kan 9th Infantry Division kan Philippine Army sa Camp Elias Angeles sa Pili, Camarines Sur an pagdakol kan numero kan mga rebelde na nagpapahayag nin kamawotang magbalik-loob sa gobierno.
Sa intrevista kan Bombo Radyo Legazpi ki Col. Ferozaldo Paul Regencia, Asst. Division Commander for Reservist and Retirees Affairs at 9th ID spokesman, nasa 39 personalidad na suboot an naenot nang nagsurendir sa rehiyong Bicol mantang nasa proseso pa asin piglalaomang madadagos an pagsuko kan labi sa 30 miembro kan New People’s Army (NPA).
Katakod kaini, padagos man an pag-engganyar kan puersa sa mga mawot pang magsuko kasabay kan ipigtataong amnestiya sa irarom Comprehensive Local Integration Program (CLIP).
Pagtataong-duon pa kan opisyal na lakdang ini tangarig na maitao an totoong katoninongan na pinakakaipuhan kan saenman na sociedad.
Mientras tanto, garing nagdistansya man an opisyal sa pagsimbag sa mga kontrobersyal na tataramon na binutasan ni Presidente Rodrigo Duterte kontra sa mga rebelde urog na sa isyu kan ‘shoot the vagina’ remark kan halangkaw na opisyal.
Segun ki Regencia, dakula an importansyang ipigtatao kan militar sa direchos humanos bako sana sa garadanan asin giyera.
