LEGAZPI CITY — Mahigot ngunyan an pigigibong pagbabatay kan Land Transportation Franchising and Regulatory Board (LTFRB) Bicol sa mga transport group na nagsasagibo ngunyan tigil-pasada sa probinsya.
Sa intrevista kan Bombo Radyo Legazpi ki LTFRB Regional Director Jun Abrazaldo, pighayag kaini na an siisay man na magibo nin kalokohan sa duwang aldaw na strike an pwedesir na mahalian nin prangkisa.
Pigklaro man kan opisyal na base sa saindang napag-olayan, an mga nagkokundusir asin nagbali sa strike na nagkawsa nin kariribukan, nantraot nin mga kagamitan, nangulog asin an mga nangharang sa mga habo magbali sa saindang aktibidad sana an posibleng makanselar an franchise.
Katakod kaini, segun sa opisyal, igwa man na nagkapirang transport group na mapasiring sa saindang opisina ngani na magkaigwa nin dayalogo ngani na maipaliwanag an mga pwedesir na mangyari sa modernization program kan gobyerno asin kun ano an saindang masunod na lakdang.
Mientrastanto, pinahimutikan man kan opisyal an alegasyon kan Condor Piston Bicol na piga hold ninda an nagkapirang mga dokumentos kan mga transport group.
Pagduon ni Abrazaldo, gabos na mapasiring sa saindang opisina an tulos na pigpipirmahan asin warang pending sa mga ini huli ta pig-iisip ninda na kun magkakaigwa nin modernisasyon, dae dapat na maipit an mga papeles na kaipuhan kan mga ini.
Nag-eksplikar man an opisyal na dae niya pwedesir na ipaotob tulos an mga kahagadan kan mga transport group asion mga operators huli ta dapat na ipaabot muna ini sa board ngani na dae siya mapahamak huli ta may mga opisyal na mas halangkaw saiya.
