LEGAZPI CITY — Arestado kan mga otoridad an tolong persona makalihis na maaktuhan na iligal na nagrerecruit kan mga miembro na papabalihon suboot sa Mindanao Alliance Composite Command-Bangsamoro Armed Forces-Moro National Liberation Front (MACC-BAF-MNLF) Highlander siring man sa National Commission on Indigenous Peoples (NCIP) sa DYME Compound, Zurbito St., Brgy. Pating, ciudad kan Masbate.
Sa nagunong impormasyon kan Bombo Radyo Legazpi, ikinondusir kan mga elemento kan Masbate CPS; Provincial Intelligence Branch; Criminal Investigation and Detection Group; Regional Intelligence Unit 5; asin Military Intelligence Company an operasyon na nagresulta sa pagkakaarestar ninda Ernesto Garcia, 63 anyos na napag-araman na retiradong Deputy Director kan Civil Service Commission-Masbate, Joseph Operario, 45-anyos mientras na kaibanan man si Leopoldo Artezuela, 39-anyos na taga-Cawayan, Masbate.
Warang maipahiling na magkakanigong dokumento an mga ini sa otoridad na rason tangarig na arestaron ini kan mga otoridad.
Naengganyar man suboot kan mga mahahamis na promesa kaini an pitong kalalakihan na na-recruit huli sa itataong P30,000 na magiging sweldo bilang armed agents na ititrain sa Cagayan de Oro City.
Sa ngonian, nakakunkon na sa karsel an mga nasabing persona na nakatalaang kahampangon an kasong pagbalgar sa Republic Act 9208 o Anti-Trafficking in Persons Act of 2003, Republic Act 10022 para sa Illegal recruitment siring man an estafa.
