LEGAZPI CITY- Tarantang nagdurulagan sa manlaen-laen na direksyon an mga tawong nagsasagibo nin iligal na pagbulang nin manok o tupada sa Brgy Gabawan Daraga, Albay.
Ini makalihis na mag-abot an mga tauhan kan Daraga Municipal Police Station ngani na magkundusir nin Oplan Sita asin Anti-Illegal Gambling operation.
Nakaresibe kaya suboot nin sumbong an istasyon na igwa nin nangyayaring tupada sa nasambitan na lugar.
Sigon ki PCI Elcid Roldan, hepe kan Daraga MPS, nawalat kan mga nagdurulag na imbwelto sa tupada an 13 motor asin 1 tricycle.
Dugang pa ni Roldan, pinaticketan na ninda sa Land Trasportation Office (LTO) an mga behikulong dae nin dokumento mantang na-impound an iba.
Pigbabalo suboot nindang maaktuhan an mismong mga para-tambod alagad an problema sigon sa hepe, bistado na kan mga ini an mga pulis.
Makikiolay man suboot sinda sa barangay kapitan kan Gabawan na makikooperar sa kapulisan huli ta pwedesir ninda ining gibuhan nin report na pigtutugutan an iligal na sugal.
Kinuwestyon man ni Roldan an hibabang pyansa para sa mga iligal na nagsusugal sa Albay na maabot sana nin hasta sa P14,000.
Kun ikukumpara kaya suboot sa Sorsogon, nag-aabot sa P50,000 an pyansa kun kaya natatakot an mga tawong maimbwelto sa tupada asin iba pang klase nin illegal gambling.
Sa ngunyan, sinabi kan opisyal na mahanap sinda nin mga tawong pwedesir na makadakop sa mga nagdurulagan na para-tupada.
