LEGAZPI CITY – Uminabot na sa 631 katawo an naaretsar kan mga kapulisan sa anom na probinsya sa Bicol Region katakod kan mas pinahigot na kampanya kontra iligal na pagsusugal.
Basado sa report kan Police Regional Office 5 o Bicol PNP, nakapagkondusir na an kapulisan nin kabilugan na 207 na anti-illegal gambling operations.
Nakapagkumpiskar na man an PNP-Bicol nin maabot sa P114,562.85.
Nangengenotan sa listahan kan pinakadakol na naarestar an Camarines Sur PPO na igwang 217 asin pigsusundan ini kan Albay PPO na nakapag-arestar nin 145 na persona sa 40 matrayumpong operasyon.
Nagpang-tulo man an probinsya kan Camarines Norte PPO na igwang 89 na naarestar asin an Sorsogon PPO na igwang 60.
Napasakamot man kan Catanduanes PPO an 54 persona sa ipigkondusir kaining 13 operasyon mantang an Masbate PPO an nakapag-arestar nin 45 katawo asin an Naga an igwang 21 naarestar sa ipiglansar kaining pitong operasyon.
Pinaglalaoman man na malobo pa an numerong ini sa pagpapadagos kan operasyon kan mga otoridad kontra iligal na pagsusugal.
