Ipighayag kan Philippine National Police (PNP) na an mga menor de edad na naarestar sa nangyaring marahas na protesta laban sa korapsiyon kan Setyembre 21 an dapat magsairarom sa rehabilitation asin counseling.
Segun ki PNP acting chief Lt. Gen. Jose Melencio Nartatez Jr., 55 na mga menor de edad asin 25 na mga adults na naarestar an pinalibre na alinsunod sa ley, partikular sa Juvenile Justice and Welfare Act.
Sinabi man ni Manila Mayor Isko Moreno na an mga menor de edad an kaipuhang darahon sa Manila Department of Social Welfare nganing magsagibo nin community service siring kan cleanup drives bilang parte kan saindang rehabilitation, reintegration asin diversion.
Tinawan-duon ni Nartatez na importante an paninimbagan, alagad dapat man na tawan atensyon an tamang paggiya asin rehabilitasyon para sa mga kajovenesan.
Inengganyar man kan PNP an mga magurang, tagapag-ataman, asin lokal na opisyal na maging aktibo sa paggiya sa mga kajovenesan nganing maibitaran an mga siring na insidente.
Para man sa 25 na mga adults na naarestar, ipigsugo ni Nartatez na makipagkoordinar an mga imbestigador sa mga prosekusyon nganing masierto an tamang pagsunad nin kaso.
