Nangapudan si Senador Erwin Tulfo na masyerto na makikinabang an milyun-milyong motorista sa excise tax suspension plan sa petrolyo na pigbubusol kan gobyerno nganing maibsan an epekto kan halangkaw na presyo kan langis.
Durante kan pagdangog kan Senate Committee on Ways and Means kan Marso 11, nagpatanid si Tulfo laban sa posibilidad na sakop sana an diesel bilang tax relief.
Sinabi niya na dakol na motorista, na naggagamit nin gasolina, an mawawalat kun limitado sana sa diesel an suspension kan excise tax.
Segun sa senador, pigkakarkulong nasa 8.5 milyon na mga Pilipino an naggagamit nin motorsiklo uru-aldaw bilang saindang pangenot na transportasyon pasiring sa trabaho o bilang paagi nin kabuhayan.
Bilang kasimbagan, sinabi ni Department of Finance Undersecretary Karlo Adriano na kokonsiderahon kan Development Budget Coordination Committee asin kan Department of Energy (DOE) an proposal nganing makagibo nin mas komprehensibong rekomendasyon para sa Presidente.
Mientrastanto, nagpatanid man si Tulfo laban sa posibleng pamulitika sa pagdistribuer kan fuel subsidy.
Pigduon kan senador na dae dapat gamiton kan mga pulitiko an oil price crisis para sa personal na ganansya.
Hale suboot sa buwis an cuartang ipapanao sa mga namamanwaan, kun kaya dae dapat magkaigwa nin interbensyon an mga politico sa pagdistribwir kaini.
