LEGAZPI CITY—Nangapudan an Daraga Municipal Disaster Risk Reduction and Management sa mga miyembro kan Barangay Disaster Risk Reduction and Management Committee na sakop kan Mayon unit area na mas magin aktibo sa pag-monitor kan kamugtakan kan saindang lugar huli sa nagpapadagos na aktibidad kan bulkan Mayon.
Segun ki Daraga Municipal Disaster Risk Reduction and Management Office Head Engr. Bim Dineros, sa intrevista kan Bombo Radyo Legazpi, na kun nabisto na an gabos na household o mga pamilya na yaon sa 8 kilometer permanent danger zone kan bulkan an tulos ining i-report sa saindang ofisina en kaso na igwang bakong ordinaryo na pangyayari sa saindang mga lugar.
Dugang niya na en kaso na maghalangkaw an alert level status kan bulkan an igwa na sindang in-close coordination sa Mayon unit areas—partikularmente an Barangay Bañadero, Budiao, Matnog, Salvacion, asin Mi-isi.
Pighayag pa kaini na en kaso mas magin peligroso pa an aktibidad kan bulkan an pwedesir man na iebakwar an mga apektadong residente kan Barangay Matnog sa Anislag Elementary School; an residentes kan Barangay Bañadero an ieebakwar sa saindang relocation site sa Anislag; an Barangay Budiao an maebakwar sa saindang relocation site asin Budiao Elementary School; mantang an mag residentes kan Barangay Salvacion asin Mi-isi an maebakwar sa Bascaran Elementary School.
Mientrastanto, dugang ni Dineros na wara man sindang naobserbaran nin anuman na human activities sa laog kan 6 kilometer permanent danger zone kan bulkan sa saindang banwaan.
