LEGAZPI CITY-Ipighayag kan sarong Toxic watchdog group na nahilingan nin pagkukulang sa Materials Recovery Facility (MRF) an mga barangay sa bilog na nacion.
Segun kay Ban Toxics Campaigner Thony Dizon sa intrevista kan Bombo Radyo Legazpi na susog sa audit kan COA kan 2023, nasa 30% pa sana kan mga barangay an igwang mga MRF.
Sinabi pa niya na importante ini ngani mapugulan an paghahakot kan sandamakmak na mga basura sa landfill.
Piggagamit an MRF ngani mahiwalay an mga basura kun sain mga residuals na sana ang kokolektahon kan mga basurero sa landfill, alagad dai man suboot ini naipapaotob huli sa kakulangan sa pasilidad.
Sa presente, may mga MRF man suboot na bako aktibo kun sain dapat maaksyunan kan lokal na gobierno ngani maayos an sistema sa pagkolekta kan mga basura.
Dagdag pa kan opisyal na importante ini ngani mapangatamanan an saindang mga basura kasabay kan pagsunod sa Republic Act 9003 na may kinaaraman sa Ecological Solid Waste Management Act sa nacion.
Mientrastanto, nagtetenir suboot na pinakadakulang porsiyento kan mga basura an mga plastic waste na nagaabot sa 20-25% orog na ngonian na nauuso an online shopping na nagkawsa nin pagdakol kaini.
Pinakadakol man na konsumo an hale suboot sa National Capital Region kun sain iyo an urban center na nagigin dakulang angat an pagdakol kan populasyon asin lokasyon kan pagtatapukan nin mga basura.
