LEGAZPI CITY – Kanya-kanyang aktibidad an manlain-lain na mga lokal na gobyerno sa provincia nin Albay para sa selebrasyon kan National Disability Rights Week ngunyang Hulyo 17 hasta 23.
Sa intrevista kan Bombo Radyo Legazpi kay Anacita Abion an Albay Provincial Disability Affairs Officer, sa laog kan nasabing semana maglulunsar nin mga aktibidad na magpapaogma sa mga persons with disabilities asin magbabarewas nin kaaraman para sa saindang derechos.
Sa banwaan nin Daraga magkakaigwa nin poster making contest, talent show asin singing contest na para sa mga persons with disabilities.
Ididisplay asin ipapabakal man an mga produkto na saindang nagibo.
Sa ciudad nin Ligao asin banwaan nin Manito magkakaigwa nin talent show na para sa mga persons with disabilities.
Iba man an tema sa ciudad nin Legazpi na magtatao nin libreng livelihood program ngani na matukdoan an mga may kapansanan na makapaghanap buhay.
Sa bilog na provincia, gabos na mga local government units na may inihanda na aktibidad na obheto maipamati sa mga persons with disabilities an pagkamoot kan gobyerno.
