LEGAZPI CITY — Nagpatanid si Regional Peace and Order Council (RPOC) chairman asin Legazpi City Mayor Noel Rosal sa gabos na miembro kan konseho urog na an mga namamayo sa lokal na gobierno na magtaga-hiro sa anti-illegal drugs campaign.
Nagtutubod kaya si Rosal na dakulang tabang an maitataong financial asin intelligence support kan mga local chief executives kun kaya kaipuhan man na pakusugon an monitoring kan mga nasa drug watchlist.
Napag-araman na dae naman isasairarom pa sa community-rehabilitation program (CBR) an mga personang nakakaag ang pangaran sa nasabing listahan kundi magigin subject na kan operasyon.
Aminado si Rosal na igwang nagkapirang mga pamayo nin lokal na gobierno na dae naghihiro sa kampanya kaya nakatalaang magbaba nin memorandum circular tangarig magcomply an mga ini sa rekisitos na pighahagad kan Philippine Drug Enforcement Agency (PDEA).
Katakod kaini, naghuma man si Rosal na posibleng maisabay man an mga pangaran kan mga nasabing opisyal sa drug watchlist kun dae pa masunod sa direktiba ni Presidente Rodrigo Duterte katakod kan nasabing kampanya.
