LEGAZPI CITY- Dakula an pasasalamat kan Sto. Domingo Municipal Police na sinda an nakakuwa rank 1 sa Unit Performance Evaluation Rating sa Class C Municipality.
Pinangenotan kan Albay Police Provincial Office an nasabing ebalwasyon kun sain nakakuwa an hepatura nin 94.76% para sa bulan kan Mayo.
Segun ki Police Major Genivieve Oserin, hepe kan Sto. Domingo Municipal Police Station sa intrevista kan Bombo Radyo Legazpi na high morale an saindang mga personahe huli ta nagbunga an saindang mga pagta trabaho.
Aminado an opisyal na difisil na mamantenir an pagigin rank 1 alagad ipagpapadagos suboot an pag-comply sa mga administrative asin operational reports.
Huli sa nasabing honra, garing nasusukol suboot an pagigin epektibo kan mga hepe na namamayo sa kada hepatura.
Katakod kaini, ipig-oorgulyo man ni Oserin na an banwaan kan Sto. Domingo an warang mga notableng darakulang insidente kaya marikas na nareresolberan an mga kaso sa lugar.
Napag-araman na nakakadugang sa puntos kun naide deklarar na cleared an gabos na mga kaso sa banwaan.
