LEGAZPI CITY – Piglalaoman ngonian na semana santa kan Mobo Municipal Disaster Risk Reduction and Management Office an mga insidente nin pagkalamos, aksidente asin iriwal na kakaimbweltuhan kan mga tawong nasa impluwensya nin arak.
Segun ki Mobo Municipal Disaster Risk Reduction and Management Office head Richard Lupango sa intrevista kan Bombo Radyo Legapi na saro an mga ini sa saindang mahigot na pinaghahandaan.
Madeploy man sinda nin mga personel sa mga pamosong karigusan sa saindang lugar sa sabado de gloria asin domingo nin pagkabuhay huli ta piglalaoman ninda an ruso kan tawo sa nasabing mga aldaw asin nganing maibitaran man an pagkalamos.
Naenot na suboot sindang nagkondusir nin inspection sa mga resort asin beach kaiba an Philippine Coast Guard asin Bureau of Fire Protection nganing masyerto an mga preparasyon kan mga owners sa pagruso kan mga bisita.
Pighayag pa kan opisyal na presenteng nakabandera an red alert status base man sa Regional Disaster Risk Reduction and Management Council (RDRRMC) memo no. 15-2025.
Sakop kan nasabing alert an mga Barangay Disaster Risk Reduction and Management Council nganing sinda na an maghiro sa mga kagananapan sa kanya-kaniya ninda lugar.
Sa presente suboot an kadaklan sa mga pigrerespondehan ninda iyo an mga medical emergencies asin warang untoward incident.
Pagirumdom ni Lupango sa publiko na magayon magselebrar kan mga tradisyon asin pagtitipon kun salbado sa mga bagay na pwedesir mangyari kun kaya dapat perming handa asin i-antisipar an gabos na bagay bagay.
