LEGAZPI CITY — (UPDATE) Dagit an pighihiling na motibo sa likod kan paggadan sa sarong preso kan kapwa preso kaini sa laog mismo kan Tabaco City District Jail.
Segun ki PC/Insp. Virgil Bibat, hepe kan Malinao Police, an biktimang si Marianito Abas, 46-anyos an naging rason kan pagkakulong kan mga nambungag digdi na sinda Glendo Cervantes, Domingo Loncero, Fernando Tarasmo asin Jinggoy Bombales.
Inakusaran an mga ini nin panlulugos asin paggadan sa aking babaye ni Abas kun kaya nakulong huli sa karumal-dumal na krimen.
Posible suboot na nag-init an payo kan mga akusado kan mahiling si Abas sa laog kan karsel kun kaya pinagtabangang bungagon na nagresulta sa pagkagadan kan biktima.
Mientras tanto, naibaba an kasong incest rape laban kay Abas kan Hunyo ngonian na taon makalihis na magreklamo an agom kaini huli sa nabados an saindang aki.
Alagad antes pa man ini, an saro pa nindang aking babaye an minolestiya man kan ama base naman sa nagluwas na resulta kan medico legal.
Taong 2015 pa suboot nagpuon an panlulugos ni Abas sa mga aki kaini asin kan madiskubre, nagdulag ini asin nagpalipat-lipat na nin istaran.
Nadakop sana ini kan Setyembre 20, aldaw nin Miercoles makalihis na isagibo an operasyon kan mga operatiba kan Malinao asin Albay Police.
Si Abas an ipigkokonsiderar na number 1 sa most wanted list kan Malinao asin number 8 man sa managing police operation.
