LEGAZPI CITY- Nasasabotan man suboot kan mga informal settlers sa Barangay Bitano, syudad kan Legazpi an mawot na ipaabot kan Philippine National Railways (PNR) katakod kan liwat na pag-operate kan Naga-Legazpi trip kaini.
Sigon ki Joel Balinis, barangay kapitan kan Bitano, saiya nang naimpormaran an saiyang mga constituentes na nakatugdok an harong sa ipigtalaan na 1-2 meter danger zone kan PNR sa riles.
Magigirumduman na sa liwat na pag-arangkada kan tren kan Pebrero 16 ngunyan na taon, sinabi ni Engineer Jose Florece na na-octaba nin haros 30 minutos an saindang byahe huli sa paglikay sa mga residentes na aranihon na sa riles an mga harong.
Dugang pa ni Balinis, nai-eksplikar nya na sa mga ini kun ano an magigin proseso sa pag-relocate sa mga maaapektaran na pamilya.
Sa ibong na lado, nagsasagibo na man suboot nin lakdang an nasambitan na opisyal ngani na mapuho an iligal na sugal sa saiyang pinamamayuhan na barangay kun sain saro sa saindang mga pighihiling na paagi an pag-opresir nin mga pakawat o sports na masirbeng libangan kan mga parawigo.
