LEGAZPI CITY — Nagpapadagos an kampanya kan Department of Health (DOH) ngani na maiibitar an publiko sa dengue asin iba pang klase nin helang na pwedesir na makua ngunyan na summer.
Ipinahayag sa Bombo Radyo Legazpi ni Cecille Pan, Regional Dengue Coordinator na dae dapat na makampante an mga tawo ngunyan na tag-init huli ta pwedesir man giraray na magkaigwa nin dengue.
Ineksplikar kaini na nagkakaigwa nin tsansa an mga lamok na mag-bonay maski summer huli sa mga stock na tubig dara kan maluyang water supply.
Katakod kaini, nagtao nin tips an opisyal kun papano mairarayo an sadiri sa lamok urog na sa dengue-carrier mosquito.
Enot, kaipuhan suboot na may lukdo an mga balde o container kun sain nakabugtak an tubig.
Panduwa, tulos na magkonsulta sa pinakaharaning health center kun duwang aldaw nang may kalintura.
Pantulo, protihiran an sadiri na dae makagat nin lamok na iyo suboot an pinaka-importante sa gabos.
Tinawan duon man ni Pan na nakukua an helang na dengue, diarrhea asin iba pa huli sa maluyang sanitation asin hygiene.
Mientrastanto, katakod kan pagdakol kan langaw sa Polangui, sinabi kaini na pwedesir na magkawsa man nin diarrhea an insekto huli ta nagtutugdon ini sa mga maaating lugar.
Sa ibong na lado, maogmang ipigheras ni Pan na nagbaba nin kwarenta y kwatrong porsyento an kaso nin dengue sa Bicol kun sain kan Enero sagkod Abril kan 2016, nakapagrehistro sinda nin kinyentos noventang kaso mantang sa parehong peryodo ngunyan na 2017, igwa na sana nin dos sientos trenta y unong dengue cases.
