LEGAZPI CITY- Inagyat kan grupong Alliance of Health Workers (AHW) sa Department of Health na magkaigwa nin transparency sa P8.23 bilyon na kantidad nin Special Risk Allowance na pigsasabing itinao na sa 499,000 na mga medical frontliners.
Sa intrevista kan Bombo Radyo Legazpi kay AHW President Robert Mendoza, aminado ining dae makapanubod na labi sa P8 bilyon na palan an naipanaong allowance kan DOH huli ta kadaklan sa saindang mga miyembrong health workers an nag-aagrangay man giraray sa kawaran nin benipisyo.
Agyat kan grupo na ipaluwas an listahan kan pigsasabing nasa kabangang milyon na health workers na natawanan kan benipisyo nganing maaraman na talaga kung sisay an nakikinabang sa pondo.
Sa ngunyan kaya kadakol na mga health workers an nakikisabay sa mga hiro protesta asin nangangapudan na matawanan na kan SRA na dae pa suboot naitatao puon kan Disyembre 20, 2021 hasta Hunyo 20, 2022.
Tinuyaw pa kan grupo kung nata nasa kabangang milyon sana mga health personnels an elligible sa SRA maski pa nasa 1.8 milyon an mga health workers sa nasyun mantang labi sa sarong milyon kaini an nagtataong serbisyo sa mga COVID 19 hospitals.
