LEGAZPI CITY — Sienerto ni Dr. Florencio Adonay, pamayo kan Albay Provincial Veterinary Office na nakaka-adjust sa labing init kan panahon na dara kan summer an mga hayop sa Albay Park and Wildlife.
Sigon ki Adonay, wara pa man sinda nin nanonotaran na animal mortality maski sa mga poultry animals arog kan manok sa ibong kan namamatean na matinding init.
Alagad kun in kaso magkaigwa man nin epekto an summer sa mga hayop arog kan severe dehydration, preparado suboot an saindang opisina na magtao nin asistensya sa mga paraoma.
Payo ni Adonay na isirong sa malimpoy na lugar an mga hayop asin tawanan nin dakol na tubig.
Sa Albay Park and Wildlife, sinabi kan beterinaryo na nakaka-adjust sa init an saindang mga inaataman arog kan tigre, bayong, sira, halas, asin iba pa.
Pigtatawanan kaya suboot an mga ini nin bastanteng suplay nin tubig.
Ineksplikar pa kan opisyal na baad magkulang sa dahon o awot na kakaunon para sa mga baka asin karabaw huli ta pwedesir ining maluyos.
Sa ibong kaini, positibo si Adonay na bako man grabe an epekto kan summer season sa mga hayop urog pa kun naaataman an mga ini nin tama.
Mientrastanto, pighahalat na sana suboot ninda an certification gikan sa Department of Environment and Natural Resources (DENR) ngani na dagos nang maibyahe an mga dugang na wild animals gikan sa nagsaradong zoo sa Cavite na nilalaoman na mangyayari antes an Magayon Festival sa Albay.
