Nakatalaang buksan kan Senado ngonian na Lunes an mga kahon nin dokumento asin computer files na isinumite ni dating Bulacan 1st District Assistant Engineer Brice Hernandez, bilang suporta sa mga paratang laban sa pirang mambabatas na dawit suboot sa iregularidad sa flood-control projects.
Segun kay Senador Panfilo Lacson, tinugutan ni Senate President Vicente Sotto III si Hernandez na paramientras na makaluwas nin Senado kan nakaaging Sabado nganing makuwa an mga dokumentong pwedesir magsirbing ebidensiya.
Enot nang idinawit ni Hernandez sinda Senador Jinggoy Estrada asin Senador Joel Villanueva sa nasabing kontrobersya.
Si Hernandez an presenteng nakakulong sa Senado makalihis siyang I-cite in contempt.
Paliwanag ni Lacson, importanteng mamantenir an chain of custody nganing masiguro na magigin malinaw asin tatanggapon sa korte an mga ebidensiya
Dagdag pa niya, susunudon kan Senado an tamang proseso sa pagbubukas kan mga dara ni Hernandez, kabale an mga dokumento asin computer, nganing posibleng maihampang ini sa masunod na hearing kan Blue Ribbon Committee sa Setyembre 23.
Sinabi pa ni Lacson na pwedesir mang matukar an mga bagong developments sa gigibuhong pagdangog.
Ipinaliwanag niya na kaya tinugutan si Hernandez na magsumite nin mga dokumento an nganing magkaigwa ini nin matibay na basehan sa mga pangaran na saiyang binanggit sa mga naenot na pagdangog, kabale sinda Estrada, Villanueva, asin dating Caloocan 2nd District Representative Mitch Cajayon-Uy.
Abo suboot magbutas nin pangaran si Hernandez nin warang kapot na ebidensiya, kun kaya nagdesisyon sindang tugutan ining magsumite nin mga magkakanigong dokumento.
