LEGAZPI CITY—Nangangapudan an grupong Basta Driver, Safety Enforcer – Albay sa mga driver mapadapit sa pagsingil nin tamang pamasahe urog na ngonian na paparaning Undas.
Segun ki Basta Driver, Safety Enforcer – Albay President Ronel Nebres, sa intrevista kan Bombo Radyo Legazpi, na nagpapagiromdom sinda sa mga jeepney driver na singilon sa normal na pamasahe an mga pasahero urog na kun dayuhan an mga ini ngani na maski papano an magigin magayon an saindang imahen sa ibang tawo.
Nagpagiromdom man si Nebres sa mga nagpapasadang tricycle driver na dapat magsingil nin tamang pamasahe partikularmente na sa may nagkapirang mga dayuhan na dae aram an distansya kan saindang dudumanan na lugar.
Mientrastanto, nangangapudan man an opisyal sa paghagad nin asistensya sa mga otoridad na pwedesir maibugtak sa tinampo nganing makatabang sa mga posibleng aberya kan mga motorista sa saindang pagbiyahe.
