LEGAZPI CITY—Piglalaoman na may maarabot nang mga delegado kan Palarong Bicol 2025 ngonian na aldaw, Marso 20, sa ciudad kan Legazpi, Albay.
Segun ki DepEd Bicol Sports Division Coordinator Francisco Dexter Sison, sa intrevista kan Bombo Radyo Legazpi, na patapos na man an saindang mga pigpapakarhay na mga pasilidad na gagamiton kan mga mapartisipar digdi.
Sa presente padagos man an saindang pag-inspeksyon sa mga electrical wirings sa mga pasilidad asin mga klasrum.
Dugang kan opisyal na may nagkapira man na eskwelahan an nagpasubli nin mga klasrum ngani na paramientras na mateniran kan mga delegado.
Sinabi man kaini na preparado na man mga opisyales kan nagkapirang ahensya asin barangay na magtabang sa kun ano man an kinakaipuhan sa nasambitang Palaro.
Tinawan-duon ni Sison na an obheto kan Palaro iyo an para maipahiling kan mga kajovenasan an saindang tibay pag-abot sa sports.
