Legazpi City- Nanggana na nin apat na medalya an mga delegado na gikan sa Probinsya kan Sorsogon sa nagpapadagos na 2024 Batang Pinoy National Championships.
Segun kay Rex Barbin, an Sports Division Coordinator kan DepEd Sorsogon sa intrevista Bombo Radyo Legazpi na nanggana na nin 2 gold medal asin 2 man na bronze an probinsya.
Nakuwa kan probinsya an 2 gold medal sa 10m Hurdle asin long jump mantang an duwang bronze medal man sa high asin long jump.
May mga naggigiribo man kan saindang pangaran sa manlaen-laing larangan sa saindang pagrepresenta kan probinsya sa naunambitang pakawat.
Nauugma si Barbin nin huli ta ini an saindang pinaka-enot na participation sa batang pinoy kan deped sorsogon asin dae ini naka partisipar kan nakaaging taon nin huli ta nakatoon sinda sa palarong pambansa.
Medyo nakaapektar man sa mga atleta asin mga coach an mga nakaaging raot kan panahon alagad dae ini nagin rason nganing dae ini makipagsabayan sa mga atleta sa enterong nasyon.
Dae man suboot masasayang an pigtataong suporta kan gobyerno probinsyal kan sorsogon nin huli ta nagbubunga an saindang pigpapagalan.
Piglalaoman man kaini na madugangan an saindang medalya partikular na sa gold medal sa mga masunod na aldaw.
